Бул долбоор «Иссык-Куль көлүн экологиялык башкаруу жана туризмди туруктуу өнүктүрүү» демилгеси алкагында ишке ашырылууда.
Министрликтин маалыматы боюнча, Орунтаев объектти, анын ичинде негизги курулуш элементтерин жана насостук станцияларды кылдаттык менен карап чыгып, иштердин мөөнөтүн жана сапатын сактоонун зарылдыгына көңүл бурду.
Учурда курулуш жайында күнүнө 14,2 миң кубометр канализациялык сууларды кайра иштетүүгө ылайыкташтырылган жаңы канализациялык тазалоо станциясы үчүн арматуралык иштер жүргүзүлүүдө. Бардык 12 насостук станция боюнча жер иштеринин аяктагандыгы маалымдалды, долбоор кийинки этапка өтүүдө.
Долбоор аяктагандан кийин борборлоштурулган канализация системасы Чолпон-Ата шаарын 100% туташтырат, ошондой эле Бостери, Бактуу-Долоноту жана Кара-Ой айылдарын, ушул аймактардагы пансионаттарды, конок үйлөрдү жана башка объекттерди камтыйт. Учурда Чолпон-Атадагы тургундардын болгону 30-40% канализация системасына туташтырылган.
Курулуш 2027-жылдын аягына чейин аяктайт деп күтүлүүдө.
Иштер 2025-жылдын июль айында башталып, China Road жана «Алкаташ» подряддык уюмдары тарабынан жүргүзүлүүдө.
