Жолугушуунун алкагында Иминов улуттук кеңештин негизги максаттары жана милдеттери, ошондой эле анын аткаруучу органы катары секретариаттын ишмердүүлүгү тууралуу маалымат берди. Ал учурда Кыргызстандын виртуалдык активдер рыногунун көлөмү 2025-жылдын биринчи жарым жылдыгынын жыйынтыгы боюнча 860 миллиард сомго жеткенин, бул болсо институттук өсүү фазасына өтүүнү көрсөтүп жатканын белгиледи.
Фархат Иминов, ошондой эле, санарип сом, реалдуу активдерди токенизациялоо боюнча долбоорлор, калктын санариптик финансылык сабаттуулугун жогорулатуу жана мыйзам чыгарууну жакшыртуу сыяктуу демилгелерди киргизүү өлкөнү Web3 технологиялары боюнча регионалдык хабга айландыруу үчүн зарыл шарттарды түзөөрүн кошумчалады.
Маанилүү учур катары KGST ТМД өлкөлөрүнүн арасында Binance платформасында листингге кирген биринчи стейблкоин болгонун, бул болсо Кыргызстандын бул тармактагы жетишкендиктерин баса белгилеп жатканын айтты.
Иминов ошондой эле 2025-жылдын ноябрь айында Кыргызстандын президенти Садыр Жапаров менен АКШнын президенти Дональд Трамптын жолугушуусунун натыйжасында жетишилген макулдашууларды эске салып, санариптик экономика, IT жана жасалма интеллект кыргыз-америка кызматташтыгынын приоритеттери экенин белгиледи.
АКШнын элчиси Кыргызстандын виртуалдык активдер рыногунун өнүгүшү ылдам темпте жүрүп жатканын, бул болсо өлкөнү Борбордук Азиядагы коңшуларынын арасында өзгөчөлөнтүп турганын белгиледи. Ал ошондой эле бул рынокту кеңейтүү үчүн бар болгон потенциалды көрсөттү.
Бул жагдайда Кыргыз тарап менен кызматташтыкты тереңдетүүгө кызыгуу билдирилди, анын ичинде виртуалдык активдерди жөнгө салуу жана өнүктүрүү боюнча америкалык мамлекеттик органдар жана компаниялар менен тажрыйка алмашуу, ошондой эле атайын программаларды жана тренингдерди уюштуруу.
