Европа кеңешинин президенти Антониу Кошта өзүнүн телеграммасында: «Мерекелик күндөрү кубанычка, тынчтыкка жана жаркын учурларга толуп, жаңы жыл сиздерге жаңы үмүт жана маанилүү жетишкендиктер алып келсин!» - деп каалады.
ОДКБнын башкы катчысы Имангали Тасмагамбетов «Кыргызстандын жетекчилигинин колдоосу биздин региондогу туруктуулукту бекемдөө боюнча амбициялуу пландарды ишке ашырууга оң таасирин тийгизет» - деп белгиледи.
ОТГнын аксакалдар кеңешинин төрагасы Бинали Йылдырым да өзүнүн эң жакшы каалоолорун билдирди: «Биз Тюрк мамлекеттер уюмунда өнүктүрүп жаткан кызматташтык маданияты биздин биргелешкен келечегибизге болгон үмүттөрүбүздү бекемдейт. Мен жаңы жылыбызда кызматташтыгыбызды тереңдетүүнү улантабыз деп ишенем. Сиздерге ден соолук, бакубаттык жана мамлекеттик ишмердүүлүгүңүздөрдө ийгиликтерди каалайм!»
Тюрк мамлекеттеринин парламенттик ассамблеясынын башкы катчысы Рамиль Хасандын куттуктоосу да президентке жана кыргыз элине арналды.
Ал Жапаровдун жетекчилигинде жүргүзүлгөн маанилүү саясий жана социалдык-экономикалык реформалардын натыйжасында Кыргызстан туруктуу өнүгүүнү көрсөтүп жатканын белгиледи. «2026-жыл маанилүү жетишкендиктер жана бакубаттык жылы болсун, өлкө адилеттүүлүк жана мыйзамдын үстөмдүгү негизинде гүлдөп-өсүүнү улантсын», - деп кошумчалады.
Мындан тышкары, ФИФАнын президенти Джанни Инфантино Садыр Жапаровго жана кыргыз элине бактылуулукту, ден соолук жана ийгиликтүү 2026 жылды каалады.
