Учурда арматура каркасын орнотуу жана монолиттүү темир-бетон плитасын коюу иштери жүргүзүлүүдө. Ошондой эле опалубканы орнотуу жана казуу иштерине активдүү көңүл бурулууда.
«Манас Ордо» комплекси 225 гектар аянтты камтыйт. Жаңы долбоордун алкагында музейдин аянты кыйла кеңейет — 450дөн 1500 чарчы метрге чейин. Имараттын архитектуралык стили кыргыз элдин улуттук өзгөчөлүктөрүн жана заманбап архитектуралык элементтерди айкалыштырат.
Министрликтен белгилегендей, «бул комплекс Борбордук Азиянын уникалдуу маданий мейкиндиги болуп, күнүнө 10 миңге чейин конок кабыл алууга мүмкүнчүлүк берет. Анын аймагында административдик борбор, 300 орундуу конгресс-холл, улуттук стильдеги коттедждер, ошондой эле жайкы жана кышкы ашканалар жана майрамдарды өткөрүү үчүн зоналар куруу пландалууда.»
Ошондой эле долбоордо соода-дем алыш зонасы жана 3500 адамды сыйдыра турган маданий-коомдук борборду түзүү каралган.
Бул «Манас Ордо» комплекси үчүн акыркы үч он жылдыкта болгон биринчи ири реконструкция.
Курулуш иштерин Курулуш министрлигине караштуу мамлекеттик «Кыргызкурулуш» ишканасы жүргүзүүдө.
