Салык кызматынын орун басары Кубанычбек Ысабеков жыйындынын максатын бизнес коомчулугуна ЕАЭБ контекстинде навигация пломбаларын колдонуу эрежелерин түшүндүрүү деп белгиледи.
Ал навигация пломбаларын колдонуудагы негизги максат — декларацияланган товарлардын коопсуздугун жана тактыгын камсыздоо экенин, бул өз кезегинде чек арадан өтүү процессин жеңилдетип, ишкерлердин жүгүн азайтууга жардам берерин баса белгиледи.
Жыйында Салык кызматынын адистери жана системаны көзөмөлдөө боюнча улуттук оператор навигация пломбаларын колдонуу тартиби тууралуу кенен маалымат беришти. Бизнес өкүлдөрү өз суроолорун берип, түшүндүрмөлөрдү алышты.
Кубанычбек Ысабеков ошондой эле салык төлөөчүлөрдү колдоо максатында Салык кызматынын кызматкерлерине жаңы көзөмөлдөө системасын колдонуу боюнча окуу иш-чаралары пландалып жатканын белгиледи.
ЕАЭБдин навигация пломбалары боюнча келишими жана Евразия экономикалык комиссиясынын чечими боюнча, 11-февралдан тарта ЕАЭБ өлкөлөрүнүн аймагында навигация пломбаларын колдонуу менен жүк ташууну туруктуу көзөмөлдөө киргизилет.
Бул система алкоголь продукциясын жана тамеки буюмдарын автомобиль жана темир жол транспорту менен ташууда колдонулат.
