2025-жылдын 25-декабрында Бишкекте Т. Эрматов атындагы Музыкалык-педагогикалык институтунун студенттери үчүн капиталдык ремонттон кийин жатакананын салтанаттуу ачылышы болду. Бул тууралуу маалыматты Билим берүү министрлиги билдирди.
Ремонттук иштер жашоо бөлмөлөрүн, санитардык зоналарды, инженердик системаларды жана жалпы мейкиндиктерди толук жаңылоону камтыды.
Салтанатка Кыргыз Республикасынын Билим берүү министринин орун басары Надира Жусупбекова, илим, жогорку билим берүү жана инновациялар министринин орун басары Бекбосун Бөрүбашев, ошондой эле меценаттардын, подрядчиктердин, администрациянын, окутуучулардын жана студенттердин өкүлдөрү катышты.
Министрлердин орун басарлары жаңыланган имаратты текшерип, студенттер менен баарлашып, алардын жашоо шарттары менен таанышышты. Визиттин натыйжасында жүргүзүлгөн иштердин сапаты жогору бааланып, долбоордун билим берүү мекемеси үчүн маанилүүлүгү белгиленди.
Салтанат учурунда Кыргыз Республикасынын Билим берүү министри Догдуркул Кендирбаева тарабынан сыйлыктар жана ыраазычылык каттары тапшырылды.
