Жаңы чара Виза Бонд пилоттук программасынын бир бөлүгү болуп, визалар боюнча убактылуу мыйзам бузуулар менен күрөшүүгө багытталган жана 2026-жылдын 21-январынан тартып күчүнө кирет. Кыргызстан Тажикстан жана Түркмөнстан менен бирге бул талап киргизилген 38 өлкөнүн катарында турат.
Визалык кепилдик - бул консулдук кызматкердин зарыл деп тапкан учурда, адаттагы визалык төлөмдөн тышкары төлөнүшү керек болгон кошумча сумма. Кепилдиктин өлчөмү $5 миңден $15 миңге чейин болушу мүмкүн жана консулдукта өткөрүлгөн маектин негизинде жеке түрдө аныкталат.
Мамлекеттик департаментте кепилдикти төлөө визаны алуу үчүн кепилдик эмес экендигин белгилешти. Кепилдик консулдук кызматкердин көрсөтмөсү боюнча I-352 формасы аркылуу гана берилет жана мамлекеттик Pay.gov платформасы аркылуу гана төлөнүшү мүмкүн. Консулдуктун расмий уруксаты жок жүргүзүлгөн төлөмдөр кайтарылбайт.
Эгерде Кыргызстандын жараны АКШдан уруксат берилген убактылуу мөөнөтүнөн мурда чыгып кетсе, визасын колдонбосо же кирүүгө уруксат берилбесе, кепилдик автоматтык түрдө кайтарылат. Бирок, убактылуу мөөнөттү бузуу, мыйзамсыз болуу же иммиграциялык статусун өзгөртүү боюнча арыз берүү, анын ичинде башпаанек берүү өтүнүчү боюнча каралган учурда каражаттар кармалып калынат.
Мындан тышкары, кирүү жана чыгуу пункттарына чектөөлөр белгиленген: визалык кепилдикти төлөгөн кыргызстандыктар АКШнын чек арасын Бостон (BOS), Нью-Йорк (JFK) жана Вашингтон (Dulles, IAD) аэропорттору аркылуу гана кесип өтүшү керек. Башкача болсо, алар кепилдиктерин жоготуу коркунучуна дуушар болушат.
Бул чара жалпы визалык талаптарга жооп берген, бирок америкалык бийликтин пикири боюнча жогору миграциялык коркунуч категориясында турган арыз берүүчүлөргө гана тиешелүү.
