Алардын айтымында, кырсык бүгүн, 14-январда, болжол менен 10:00дө Күрпсай айылындагы көпүрөдө болгон. Окуянын натыйжасында автожолдо кыймыл бир сааттан ашык убактылуу токтоп калды.
Азыркы учурда жол бир тараптуу өтүү үчүн ачылган, унаалар мазут агып кеткен участоктон өтө алышат.
Бар болгон маалыматка ылайык, отун-май материалдары менен жүк ташуучу оор унаа Бишкектен Ошко баратканда көпүрөдө айдоочу башкарууну жоготуп, айланып кеткен.
Жалал-Абад облусунун ИИББсынан билдиришкендей, Нарын дарыясына түшкөн мазуттун көлөмү азырынча такталып жатат.
Экология жана техникалык көзөмөл министрлигинин Жалал-Абад облустук башкармалыгынын начальниги Дурусбек Залимбековдун айтымында, окуя болгон жерге экологиячылар суунун үлгүсүн алуу жана мүмкүн болгон зыянды баалоо үчүн барышты. Кийинчерээк административдик протоколдор түзүлүп, күнөөлүүлөргө айып пулдар салынышы пландалууда.
Нарын дарыясынан Таш-Кумыр, Шамалды-Сая жана Үч-Коргон айылдык аймагынын тургундары үчүн ичүүчү суу жана сугат үчүн пайдаланылат экенин белгилеп өтүү керек.
