Хоккей боюнча 20 жашка чейинки оюнчулар арасында дүйнө чемпионаты 18-январда Бишкекте башталды. Бул тууралуу Кыргызстандын мамлекеттик физикалык тарбия жана спорт агенттигинде маалымдалды.
Иш-чаранын ачылышына Кыргызстандын өкмөтүнүн төрага орун басары Эдиль Байсалов, мамлекеттик физикалык тарбия жана спорт агенттигинин директору Казыбек Молдажиев, Бишкек шаарынын мэри Айбек Джунушалиев, Улуттук Олимпиада комитетинин төрагасы Умбеталы Кыдыралиев, Хоккей боюнча эл аралык федерациясынын кеңешинин мүчөсү Франц Рейндл, Кыргызстандын Хоккей федерациясынын президенти Анвар Оморканов, ошондой эле спортчулар, машыктыруучулар жана спорт сүйүүчүлөр катышты.
Эдиль Байсалов дүйнөнүн төрт бурчунан жаш хоккейчилердин кыргыз жерине келип жатканына кубаныч билдирди. Ал мындай эл аралык турнилер спорт аркылуу достук байланыштарды бекемдөөгө жардам берерин жана жаштарга маанилүү тажрыйба алууга мүмкүнчүлүк берерин белгиледи. Ошондой эле катышуучуларга адилеттүү оюн, жогорку спорттук жетишкендиктер жана унутулгус матчтарды каалады.
Ачылыш күнү Кыргызстандын жаштар курамасы менен Гонконг (Кытай) командасы беттешти.
Оюндун жыйынтыгында Кыргызстандын курамасы Гонконг командасын 4:1 эсебинде жеңди.
U-20 хоккей боюнча дүйнө чемпионаты 24-январга чейин уланат. Соревнованияга Кыргызстандын, Мексиканын, Люксембургдун, Түштүк Африканын, Ирандын жана Гонконгдун (Кытай) курамалары катышууда. ```
