Визит учурунда Маткеримов жугуштуу респиратордук вирустук инфекциялар жана грипп менен ооругандардын медициналык жардам алуу системасы менен таанышып, оорулуулардын санынын өсүшү шартында орун фондунун учурдагы пайдаланылышын баалады.
Оорукананын директору Шаят Абдурахманов билдиргендей, стационарда 270 орун бар: анын 180и балдар үчүн, калган 90ы чоңдор үчүн. Оорулуулардын санынын көбөйүшү мезгилинде кайрылуулар саны өсүүдө, бирок бардык муктаждар зарыл медициналык жардамды алышат.
Акыркы жылдарда, анын ичинде административдик-территориялык өзгөрүүлөрдүн натыйжасында, Ош шаарынын аймагы жана калкынын саны көбөйдү, бул медициналык мекемелерге кошумча жүк тартууда жана стационарлардын убактылуу толукталышына алып келүүдө.
Жолугушуунун жыйынтыгы боюнча Маткеримов бир катар сунуштарды берди, анын ичинде чоңдор үчүн альтернативдүү бөлүмдөрдө кабыл алууну уюштуруу, ошондой эле инфекциялык стационарды балдарга жардам көрсөтүү үчүн максималдуу пайдалануу, анткени алар сезондук жугуштуу оорулар учурунда эң осал топ болуп саналат.
Мындан тышкары, санитардык-эпидемиологиялык нормаларды сактоону күчөтүү, оорулуулардын так маршрутизациясын камсыз кылуу, медициналык персоналдын үзгүлтүксүз иштешин жана берилген жардамдын сапатын көзөмөлдөө тапшырылды.
