Президенттин өкүлү Азамат Осмоновдун жетекчилиги астында райондордун акимдери, шаар мэрлери жана айыл өкмөттөрүнүн башчылары катышкан кеңейтилген аппараттык жыйын өттү.
Азамат Осмонов «2026-жыл так аракеттер, жеке жоопкерчилик жана регионду башкарууда бирдиктүү мамиле жылы болушу керек» деп белгиледи. Жыйында облустун экономикалык, социалдык, инфраструктуралык жана экологиялык өнүгүүсүнө багытталган алты комплекстүү долбоор сунушталды. Бул демилгелер инвестицияларды тартуу, айыл чарбасын жана ишкердикти колдоо, туризм тармагын өнүктүрүү, экологиялык абалды жакшыртуу, укук тартибин камсыздоо жана инфраструктураны модернизациялоо үчүн ыңгайлуу шарттарды түзүүгө багытталган.
Жыйында ар бир долбоорго конкреттүү координаторлор дайындалганы, так милдеттер жана ишке ашыруу мөөнөттөрү аныкталганы, ошондой эле натыйжалуулук көрсөткүчтөрү орнотулганы айтылды. Долбоорлордун аткарылышы ай сайын көзөмөлдөнөт. Дисциплина, мыйзамдуулук жана коррупцияга каршы күрөш маселелерине чоң көңүл бурулду. Бийлик өкүлдөрү формалдуу мамиле болбошу керектигин жана ар бир жетекчи өз аймагындагы абал үчүн жеке жоопкерчилик тартарын баса белгилешти.
Президенттин өкүлчүлүгүнүн маалыматы боюнча, Чүй өрөөнүндө көп жылдар бою өнөр жай объектилери жана заводдор жашоо массивдерине, билим берүү мекемелерине жана балдар бакчаларына жакын курулуп келген, бул көп учурда санитардык нормаларды бузуу менен болгон. Облустун бийлиги мындай практика экологиялык кооптуулуктарды жаратып, келечекте экономикалык, социалдык жана экологиялык көйгөйлөргө алып келиши мүмкүн деп эсептейт.
Жогоруда айтылганды эске алып, 2026-жылдан тартып бардык жаңы долбоорлор кластердик принципти эске алуу менен ишке ашырылат. Ар бир жаңы курулуш объектин пландаштырууда кластердик зонирлөөнү эске алуу зарыл: оор өнөр жай, туристтик объектилер, ошондой эле социалдык жана турак жай комплекстери бири-биринен алыс жайгаштырылышы керек.
Бул стандарттардын сакталуусун көзөмөлдөө акимдерге, мэрлерге жана айыл өкмөттөрүнүн башчыларына жүктөлөт. Жерлерди өнүктүрүүнүн жаңы генеральдик пландары кластердик мамилени эске алуу менен иштелип чыгышы керек.
