Берилген документке ылайык, Эмгек, социалдык камсыздандыруу жана миграция министрлигине караштуу Республика протез-ортопедиялык буюмдар мекемесин ден соолук мүмкүнчүлүктөрү чектелген адамдарды реабилитациялоо борбору менен бириктирүү пландаштырылууда. Бириктирүү процесси аяктаган соң, жаңы мекеме Республика протез-ортопедиялык буюмдар жана калыбына келтирүү реабилитациясы мекемеси деп аталат.
Жаңы түзүлгөн уюм эки мекеменин укук мураскери болуп, алардын милдеттерин толук көлөмдө аткарып кетет деп белгиленет.
Эмгек министрлигине өткөрүү актын даярдоо жана жаңы мекемени кайра каттоодон өткөрүү тапшырылды. Ошондой эле, ведомствого жаңы токтомго ылайык өз чечимдерин тууралап, функциялардын кайталоосун болтурбаш үчүн штаттык түзүмдү оптималдаштыруу тапшырылды.
Өкмөттө бул токтомдун ишке ашырылышы бекитилген штаттык бирдиктердин санынын алкагында жана республика бюджетинде каралган каражаттарды колдонуу менен өтөт деп баса белгиленет. Кошумча финансылык ресурстар каралган эмес.
Бул токтом долбоору президенттин мамлекеттик кызмат системасындагы натыйжалуулукту жогорулатуу жана бюрократияны кыскартуу боюнча чыгарган Указына ылайык иштелип чыккан.
