Комитеттин жыйынында Маданият, маалымат жана жаштар саясаты министринин орун басары Марат Тагаев тарабынан сунушталган Кино департаментинин иши талкууланды.
Талкуу учурунда депутат Эрулан Кокулов фильмдердин прокаты жана көрсөтүлүшүн жөнгө салуу боюнча тынчсыздануусун билдирди, алкоголдук жана тамеки продукциясынын жарнамасы кинотеатрларда орун албашы керектигин белгиледи. Ал бул маселе төрт жыл мурун көтөрүлгөнүн эске салып, бирок жарнама дагы эле кээ бир кыргыз фильмдеринде кездешип жатканын айтты. Депутат Гулай Машрапова акыркы үч жылда толук метраждуу фильмдерди жаратууга бөлүнгөн бюджеттик каражаттар тууралуу сөз кылып, прокаттан кийин бул каражаттарды кайтаруу жана тарыхый чыгармаларды экрандаштыруу зарылдыгын талкуулады. Болот Сагынаев мамлекеттик колдоо жана отандык кинону каржылоо, ошондой эле фильмдердин мазмунун мыйзамдарга жана маданий нормаларга ылайык контролдоо боюнча маселелерди көтөрдү. Санталат Аманова киноиндустрияда реформаларды жүргүзүү зарылдыгына көңүл бурду.
Министрдин орун басары Марат Тагаев мурда фильмдер мамлекеттик заказ боюнча коммерциялык эмес максатта түзүлгөнүн, бирок келечекте коммерциялык долбоорлорго да көңүл бурулушу пландалууда экенин белгиледи. Ал «Сынган кылыч» жана башка тарыхый долбоорлорду тартуу пландары жөнүндө маалымдады, алардын ишке ашышы үчүн тиешелүү кино павильондорунун керектелерин баса белгиледи.
