Ведомствонун маалыматына ылайык, Кара-Суй райондук ички иштер бөлүмүнүн экстремизмге жана мыйзамсыз миграцияга каршы күрөшүү кызматынын кызматкерлери Ош шаары жана Ош облусу боюнча ГКНБнын Кара-Суй райондук бөлүмүнүн өкүлдөрү менен биргеликте ыкчам иш-чараларды өткөрүштү. Натыйжада, социалдык тармактарда экстремисттик материалдарды таратууга шектелген жарандар аныкталды.
Текшерүү учурунда шектүүлөр өз аккаунттары аркылуу «Ирак жана Левант Ислам мамлекети» уюмуна тиешелүү материалдарды жарыялап келгендиги белгилүү болду. Жыйналган материалдардын негизинде Кылмыш кодексинин 332-беренеси («Экстремисттик материалдарды даярдоо жана таратуу») боюнча кылмыш иши козголуп, тергөө иштери башталды.
Ыкчам-издөө иш-чараларынын жыйынтыгы менен С. уулу А., 2001-жылы туулган, жана А.М., 1997-жылы туулган жарандар кармалды. Алар убактылуу кармоо жайына жайгаштырылды.
Ишке тиешеси бар башка адамдарды аныктоо боюнча ыкчам-тергөө иш-чаралары улантылууда.
