2025-жылдын 26-декабрында Кыргыз Республикасынын саламаттык сактоо министри Каныбек Досмамбетов Бириккен Улуттар Уюмунун өкүлдөрү менен жолугушуу өткөрдү, анда дары-дармек камсыздоо маселелери боюнча учурдагы өз ара түшүнүшүү меморандуму талкууланды. Бул тууралуу Саламаттык сактоо министрлигинин маалымат кызматы билдирди.
Жолугушуунун жүрүшүндө тараптар дары-дармек камсыздоо боюнча кызматташтыктын негизги багыттарына, анын ичинде улуттук жөнгө салуу системасын өнүктүрүүгө, маанилүү дары-дармектерге жеткиликтүүлүктү кеңейтүүгө, сатып алуулардагы ачыктыкты жогорулатууга жана жеткирүүлөрдүн туруктуулугун камсыздоого көңүл бурушту.
Министр сапаттуу дары-дармектерге жеткиликтүүлүк адилеттүү жана туруктуу болушу керектигин белгилеп, бул саламаттык сактоо тармагындагы мамлекеттик саясаттын приоритети болуп саналат жана туруктуу өнүктүрүү максаттарына жетүүдө, айрыкча «Жакшы ден соолук жана бакубаттык» максатына түздөн-түз байланыштуу экенин айтты.
Сатып алуулардагы ачыктык жана коррупцияны алдын алуу маселелерине өзгөчө көңүл бөлүндү. Каныбек Досмамбетов системалык өзгөртүүлөрдү жүргүзүү зарылдыгын белгилеп, адилетсиз практикаларды жоюу жана бюджеттик каражаттарды натыйжалуу пайдаланууну камсыздоо үчүн чараларды көрүү керектигин айтты.
«Мамлекет жыл сайын дары-дармек сатып алууга чоң каражат бөлөт, биздин милдет – аларды мүмкүн болушунча ачык жана рационалдуу пайдаланууну камсыздоо. Биз сатып алууларда катуу көзөмөлдү орнотууга, системаны адилетсиз практикалардан тазалоого жана туруктуу, адилеттүү өз ара аракеттенүүнү түзүүгө даярбыз. Биз өнүктүрүү боюнча өнөктөштөрүбүз менен системалык жана узак мөөнөттүү кызматташууга үмүттөнөбүз», - деди министр.
Өнөктөштөр сатып алууларды эл аралык стандарттарга ылайык жүргүзүү, жеткирүү чынжырларын башкаруу, санариптик чечимдер, фармаконадзор жана саламаттык сактоо тармагынын институттук потенциалын жогорулатуу боюнча кызматташтыкты тереңдетүүгө даяр экендиктерин билдиришти.
Жолугушуунун жыйынтыгында тараптар өз ара түшүнүшүү меморандумунун жоболорун ишке ашыруу боюнча биргелешкен иштерди улантууга, дары-дармек коопсуздугун бекемдөөгө жана бейтаптардын кызыкчылыктарын коргоого багытталган конкреттүү жана өлчөнүүчү натыйжаларга көңүл бурууга макулдашышты. ```
