Жыйында катышуучулар прокуратура органдарынын мыйзамдуулукту камсыз кылуу, жарандардын жана мамлекеттин укуктарын коргоо, ошондой эле коррупцияга каршы күрөшүү боюнча ишмердүүлүгүнүн жыйынтыктарын карашты.
«Жыйында иштеги кемчиликтер жана аларды жоюу үчүн мүмкүн болгон чаралар талкууланды. Генералдык прокурор Максат Асаналиев прокуратуранын ишин уюштурууда системалык мамиленин маанилүүлүгүн белгилеп, прокурордук көзөмөлдүн жана жарандардын укуктарын коргоонун сапатын жогорулатуу зарылдыгына көңүл бурду. Ал ошондой эле мыйзамдардын так жана бирдей аткарылышын камсыз кылуу керектигин белгиледи. Ар бир кайрылуу жана арыз боюнча терең анализ жүргүзүү, формалдуу мамиле жасоонун болбошу жана убагында чараларды кабыл алуу маанилүү», — деп айтылат пресс-релизде.
Генералдык прокурор прокуратурага коюлган стратегиялык тапшырмаларды аткаруу үчүн негизги кадамдарды белгилеп, артыкчылыктуу багыттарда көзөмөлдү күчөтүүгө, кызматтык тартипти сактоого жана прокуратура органдарынын жалпы ишинин натыйжалуулугун жогорулатууга көңүл бурду.
