Жаңы жылдык майрамдарга байланыштуу, Бишкектин жылуулук электр борборунун кызматкерлери күчөтүлгөн режимге өткөрүлдү, бул тууралуу мэриянын маалымат кызматы билдирди.
ТЭЦтин авариялык кызматтары кезек-кезеги менен ар кандай өзгөчө кырдаалдарга 24 саат бою жооп берүүгө даяр.
Майрам күндөрүндө туруктуу жылуулук жана электр энергиясын камсыздоо үчүн негизги жана жардамчы жабдуулардын ишине көзөмөл күчөтүлдү. Ошондой эле жооптуу адистер үчүн кезек графиги уюштурулуп, профилдик кызматтар менен өз ара аракеттенүү камсыздалды.
«Бишкек ТЭЦ» ишканасы станция штаттык режимде иштеп жатканын жана майрам мезгилинде борбордун ишенимдүү энергия менен камсыз болушу үчүн бардык зарыл чаралар көрүлгөнүн билдирди.
