Талас шаарынан Бишкектеги жогорку окуу жайларында окуп жаткан студенттердин айтымында, быйыл баалар өзгөчө жогорулады. 7 орундуу унааларда жол кире 1800 сом, 4 орундуу унааларда 2000 сомго чейин турат. «2500 сомго учак менен жетип алса болот. Каникул учурундагы мындай баа көтөрүлүшү студенттер үчүн финансылык жүк болуп жатат», - деп белгилешти алар.
___________
2023-жылдын декабрь айынын аягында жана 2024-жылдын декабрь айында Turmush жол киренин жогорулашы тууралуу дагы жазган. Талас облусунун тургундары жаңы жылдык майрамдар алдында Бишкек шаарынан окуп, иштеп жаткан жерине кайра кайтып жаткандыгын айтышты. 30-декабрда борбордон келген жүргүнчүлөр, отуруу 1300 сом эмес, 1500 сом адам башына жүргүзүлөөрүн айтышты.
Талас облусунун Ички иштер башкармалыгынын ОБДДсынан билдиришкендей, инспекторлор айдоочулар менен түшүндүрүү иштерин жүргүзүшүүдө, бирок жол кире тарифтерин жөнгө салууга кийлигише алышпайт. Бул маселени Экономика жана соода министрлигине караштуу Антимонополь жөнгө салуу кызматы чечет.
Бишкек—Талас—Бишкек маршруту боюнча жол киренин жыл сайын суук түшкөндө жогорулашы болуп турат. Мисалы, 2022-жылдын ноябрь айында Turmush Талас—Бишкек маршруту боюнча жол кире 1200 сомго жогорулаганын жазган.
Ошол учурда айдоочулар абанын өзгөрүшүнө байланыштуу жол киренин 800 сомдон 1200 сомго көтөрүлгөнүн айтышкан. Алар муну жолдун азыр «абдан кооптуу» экендиги менен түшүндүрүштү. «Сапарга чыкпастан мурун транспорт каражаттарынын техникалык абалын текшеребиз, шинабызды кышкысына алмаштырабыз, жолдо калып калуу коркунучун жокко чыгаруу үчүн. Мунун бардыгы чыгым. Мындан тышкары, ЖЖМ баасы да жогорулады. Бул жол киренин жогорулашына таасир этти. 7 орундуу унаада жол кире 1000 сом, 4 орундуу унаада 1200 сомду түзөт», - деп айтышты айдоочулар.
