Кыргыз Республикасынын Транспорт жана байланыш министрлигинен билдиришкендей, Суусамыр–Талас–Тараз автотрассасынын IV фазасын реконструкциялоо боюнча иштер үзгүлтүксүз уланууда.
Учурда жолдун бетин тегиздөө жана кеңейтүү, суу өткөргүч түтүктөрдү жылдыруу, электр линияларынын бетон опорлорун демонтаждоо жана көпүрөлөрдү куруу боюнча иштер жүрүүдө.
Проектте 147ден ашык атайын техника жана 229 жумушчу тартылган. Мындан тышкары, объектте эки асфальтобетон заводу, бир бетон заводу жана эки майдалоо станциясы орнотулуп, пайдаланууга берилди.
Реконструкцияланып жаткан участоктун жалпы узундугу 93 километрди түзөт. Трасса Талас шаарынан башталып, «Кичи-Капка» өткөрмө пунктуна чейин уланат. Курулуш иштеринин аякташы 2025-2028-жылдарга пландалууда, ал эми проекттин кепилдиги 5 жылды түзөт.
«Проекттин алкагында алты көпүрөнү реконструкциялоо, бир жер астындагы өтмөктү куруу, ошондой эле айылдарда тротуарларды жана жарыктандырууну уюштуруу иштери жүргүзүлөт. Жолдун техникалык категориясы III категориядан II категорияга көтөрүлөт», - деп белгиленет билдирүүдө.
