Бүгүн Ысык-Көл районунда жайгашкан Тору-Айгыр айылында жаңы суу менен камсыздоо системасынын ачылышы болду. Бул тууралуу Суу ресурстары, айыл чарба жана кайра иштетүү өнөр жайы министрлиги маалымдады.
Иш-чарада өкмөт башчысынын орун басары жана Суу ресурстары, айыл чарба жана кайра иштетүү өнөр жайы министри Бакыт Торобаев, ошондой эле Ысык-Көл облусундагы президенттин ыйгарым укуктуу өкүлү Бакытбек Жетигенов жана башка мамлекеттик өкүлдөр катышты.
Бакыт Торобаев калкты сапаттуу ичүүчү суу менен камсыз кылуунун маанилүүлүгүн белгилеп, бул мамлекеттик саясаттын приоритети экенин айтты. Бул, анын айтымында, жарандардын ден соолугуна түздөн-түз таасир этет жана айылдык аймактардын туруктуу өнүгүүсүнө жардам берет.
Полпред бул долбоорду ишке ашыруу региондун социалдык инфраструктурасын кыйла жакшыртып, жергиликтүү тургундардын жашоо деңгээлин жогорулатат деп белгиледи.
Район башчысы Жапарбек Ормонов суу менен камсыздоо системасынын ишке кириши айыл үчүн эң татаал маселелердин бири болгонун айтып, анын ишке ашырылышына катышкан бардык адамдарга ыраазычылык билдирди.
«Тору-Айгыр айылындагы суу менен камсыздоо системасын реконструкциялоо (ЛОТ-1)» долбоорун ишке ашыруу 62 080 254 сомго бааланган.
Суу түтүктөрүнүн жалпы узундугу 15 104 метрди түзөт.
Системада 300 м³ көлөмдөгү эки суу резервуары орнотулган.
12 өрт гидранттары орнотулган.
600 суу эсептегич орнотулган.
Бактерициддик установка үчүн имарат курулган.
Сырттагы электр тармактары жана ички суу түтүктөрү тартылган.
