Бакыт Торобаев Дубайдагы форумда. Министрликтин маалымат кызматынын сүрөтү.
Дубайда өткөн Дүйнөлүк өкмөттөр саммитинин алкагында өткөн туруктуу таасир форумунда, өкмөт башчынын орун басары жана суу ресурстары, айыл чарба жана кайра иштетүү өнөр жайы министри Бакыт Торобаев климаттын өзгөрүшүнүн Иссык-Көлгө тийгизген олуттуу кесепеттерин билдирген. Бул маалымат министрликтин маалымат кызматы тарабынан таратылган.
Торобаев Иссык-Көл "аймактык мааниси бар уникалдуу экосистема, ошондой эле Кыргызстан үчүн социалдык-экономикалык жана табигый ресурс" экенин баса белгиледи.
Ошентсе да, көл акыркы он жылдарда олуттуу климаттык чакырыктарга дуушар болууда.Анын айтымында, Иссык-Көлдөгү суу деңгээли XIX кылымдын ортосунан бери дээрлик 14 метрге төмөндөгөн, жалпы суу көлөмү болжол менен 85 миллиард кубометрге кыскарган.
Мындан тышкары, көлгө кулаган дарыялардын саны да кыйла кыскарган, бул муздардын эриши, гидрологиялык режимдин өзгөрүшү жана суу керектөөнүн көбөйүшү менен байланыштуу.
Торобаевдин айтымында, Кыргызстан Иссык-Көлдү сактоону глобалдык климаттык жана суу маселелеринин маанилүү элементи катары карайт. Ал кыска мөөнөттүү чечимдерден узак мөөнөттүү, илимий маалыматтарга жана инвестицияларга негизделген чечимдерге өтүү зарылдыгын белгиледи.
Министр ошондой эле дүйнөлүк коомчулукту суу ресурстарын туруктуу башкаруу, экология жана климат маселелерин интеграциялоо, ошондой эле уникалдуу табигый объекттерди коргоого багытталган биргелешкен инициативаларды колдоого чакырды.
