Жакында социалдык тармактарда министрдин орун басары Марат Тагаевдин бир делегаттын суроосуна жооп берген каты пайда болду. Делегат блогерлерди өспүрүмдөргө терс таасир эткен контентти таратканы үчүн жоопкерчиликке тартуу зарылдыгын көтөргөн. Тагаевдин жообунда министрлик мыйзам долбоору үстүндө иштеп жаткандыгы айтылат. Анда 10 миңден ашык жазылуучусу бар блогерлер жарнама кирешелеринен салык төлөөгө милдеттүү болушу керек деген пункт бар.
Министрликтен мыйзам долбоору блогерлердин жарнама ишмердүүлүгүн гана эмес, алардын ишинин башка аспектилерин да камтыйт деп такташты.
"Жарнама үчүн салык төлөө — бул мыйзам долбоорунун бир гана аспекти. Бул мыйзам кайсы блогерлерге, 10, 20 же 30 миң жазылуучусу барларга колдонулат деген суроо дагы Мамлекеттик салык кызматы менен талкууланууда. Жалпы алганда, документ блогерлердин ишмердүүлүгүн жөнгө салат. Ал азыркы учурда иштелип жатат, жана даяр болгондо, биз аны коомдук талкууга сунуштайбыз", — деп түшүндүрүштү Маданият министрлигинен.
Мыйзам долбоору быйылкы жылдын апрель же май айларында талкууга коюлары күтүлүүдө.
Эскерте кетсек, өткөн жылдын жазында Маданият министрлиги блогерлер үчүн мыйзам долбоорун активдүү иштеп жатканы тууралуу маалымат чыккан.
