Президент Касым-Жомарт Токаев архивдик иштерге жана мыйзамсыз контентти таратууну чектөөгө байланыштуу Казакстандын бир катар мыйзам актыларын өзгөртүп жаткан мыйзамга кол койду, деп билдирет Акорданың басма сөз кызматы.
Бул мыйзам коомдук жайларда, массалык маалымат каражаттарында, телекоммуникациялык тармактарда жана интернет платформаларында педофилияны жана традицияга жатпаган сексуалдык багытты пропагандалоого байланыштуу маалыматтарды жайгаштырууга чектөөлөрдү киргизет. Сенаторлордун билдирүүсүнө ылайык, бул мыйзамдын негизги максаты – балдардын укуктарын коргоо.
12-ноябрда мажилис Казакстанда ЛГБТ-пропагандасына тыюу салган мыйзамды кабыл алды. Мыйзам күчүнө киргенден кийин, тиешелүү контент 18+ жаш чектөөсү менен белгиленет. Сенат бул мыйзамды 4-декабрда карап чыгышы пландалган, бирок анын айрым жоболорун кошумча талкуулоонун зарылдыгына байланыштуу күн тартибинен алынып салынды.
Маданият министрлигинде эл аралык тажрыйбаны изилдеп, мындай нормалардын агрессиянын же социалдык изоляциянын өсүшүнө алып келери тууралуу кооптонууларды тастыктаган маалымат табылбаганын белгилешти. Вице-министр Евгений Кочетов башка өлкөлөрдө катуу чектөөлөр киргизилгенин, бирок бул сынчылар белгилегендей терс реакцияга алып келбегенин кошумчалады.
Сенат 18-декабрда Казакстанда ЛГБТ-пропагандасына тыюу салган мыйзамды кабыл алды.
