Жаңы жарлыкка ылайык, толук тыюу Буркина-Фасо, Лаос, Мали, Нигер, Сирия, Сьерра-Леоне жана Түштүк Судан өлкөлөрүнүн жарандарына, ошондой эле Палестиналык улуттук администрация тарабынан берилген документтердин ээлерине карата киргизилди. Ангола, Антигуа жана Барбуда, Бенин, Габон, Гамбия, Доминикан Республикасы, Замбия, Зимбабве, Кот-д’Ивуар, Малави, Мавритания, Нигерия, Сенегал, Танзания жана Тонга өлкөлөрүнүн жарандарына карата жарым-жартылай чектөөлөр киргизилди.
Расмий билдирүүдө мындай чаралар коопсуздук жана маалымат алмашуу жаатында олуттуу кемчиликтерге ээ өлкөлөргө багытталгандыгы айтылган.
Ошол эле учурда АКШ Түркмөнстандын жарандары үчүн иммиграциялык эмес визалар боюнча чектөөлөрдү алып салууда, бирок иммиграциялык визаларды берүү токтоп турат. Бул чечим Ашхабаддын америкалык тарап менен «продуктивдүү кызматташып» жаткандыгы жана идентификациялоо жана маалымат алмашуу процедураларын жакшыртуу боюнча прогресс көрсөтүп жаткандыгы менен байланыштуу.
Трамп буга чейин окшош тыюуларды киргизген, бирок аларды Байден жокко чыгарган
Дональд Трамп өзүнүн биринчи мөөнөтүндө Куба, Чад, Иран, Ливия, КНДР, Сомали, Судан, Сирия, Венесуэла жана Йемен өлкөлөрүнүн жарандары үчүн окшош чектөөлөрдү киргизген, алар кийин Джо Байден тарабынан жокко чыгарылган.
Трамп бул чаралар «абдан ийгиликтүү» болгонун жана АКШнын аймагында террордук актыларды алдын алууга жардам бергенин белгилеген. Ал: «Биз кирүүгө тыюу салууну калыбына келтиребиз жана радикал исламдык террорчулардын өлкөбүзгө киришине жол бербейм» деп баса белгилеген.
2025-жылдын июнь айында Ак үйгө кайтып келген Трамп 19 өлкөнүн жарандарына чектөөлөрдү кайрадан киргизди. Афганистан, Гаити, Иран, Йемен, Ливия, Мьянма, Сомали, Судан, Конго Республикасы, Чад, Экваториалдык Гвинея жана Эритрея өлкөлөрүнүн жарандарына кирүүгө толук тыюу салынды, ал эми Бурунди, Венесуэла, Куба, Лаос, Сьерра-Леоне, Того жана Түркмөнстан өлкөлөрүнө жарым-жартылай чектөөлөр киргизилди.
Бул жолу Түндүк Корея жана Сирия жаңы чектөөлөргө кирбегенин белгилеп кетсек болот.
