2025-жылдын 1-декабрына карата Кыргыз Республикасынын Эмгек, социалдык камсыздандыруу жана миграция министрлигине кайрылган жарандардын активдүүлүгү байкалууда.
Министрликтин маалымат кызматынын маалыматына ылайык, эң көп кайрылуулар борбордон (694) келип түшсө, андан кийин Чүй облусу (224) жана Ош облусу (176) турат. Ошол эле учурда, Талас облусунда эң аз кайрылуулар катталган – 16 жана өлкөдөн тышкары – 11.
Министр жана анын орун басарлары жарандарды кабыл алууну үзгүлтүксүз өткөрүп турушат: министр жума күндөрү 9:00дөн 11:00гө чейин, ал эми орун басарлары 10:00дөн 12:00гө чейин кабыл алат. Ноябрь айында 307 жеке кабыл алуу катталган. Ошондой эле 1966 жана 66-01-07 телефон линияларына 6 345 консультациялык суроо келип түшкөн. Мындан тышкары, кайрылуулар онлайн платформалар жана «1-кабылдама» радиопередачасы аркылуу да каралган.
Кайрылуулардын себептерине келсек, көпчүлүк суроолор эмгек мамилелери жана контролго (18%), турак жай маселелерине (13,1%), үй-бүлөлөргө жана балдарга социалдык колдоо (11,8%), мүмкүнчүлүгү чектелген балдарды тейлөө (10,8%), ай сайын берилүүчү жөлөк пулдар (9,7%) жана материалдык жардам (5%) боюнча болгон. Калган кайрылуулар аз пайызды түзгөн.
1 374 контролдонуучу кайрылуудан 1 329 (96,7%) аткарылган, 45 (3,3%) иште калууда. Эң актуалдуу темалар турак жай, социалдык жөлөк пулдар, санаторийлерге жолдомолор, социалдык кызматкерлердин иши, балдарды окутуу, жумушка орношуу, миграция жана мүмкүнчүлүгү чектелген адамдарды колдоо маселелерин камтыган.
Министрлик жарандардын кайрылууларын системалуу негизде карап чыгуу улантылып жатканын жана бардык суроолор мыйзамга ылайык каралаарын баса белгилейт.
