Джаманбаева мындай окуялар аялдардын коопсуздугуна шек келтирерин, көп учурда алар агрессивдүү өнөктөштөрүн таштап кете албай тургандыгын белгиледи. Ал күнөөлүүлөр үчүн катуу жаза берүүнүн зарылдыгын талап кылууда.
Жакындарынын маалыматына ылайык, У.Ж. ушул жылдын ноябрь айында укук коргоо органдарына үй-бүлөлүк зомбулук боюнча арыз жазган жана кийинчерээк ажырашуу процесси боюнча арыз берген.
Акыйкатчы институту өлтүрүлгөн аялдын үй-бүлөсүнө психологиялык жана юридикалык жардам көрсөтүүгө даяр экенин жарыялады.
Ички иштер министрлигинин маалыматы боюнча, ушул жылдын 11 айында Кыргызстанда үй-бүлөлүк зомбулук боюнча дээрлик 20 миң учур катталган, анын ичинен 519 учур кылмыш ишин козгоого негиз болгон. Омбудсмен институтуна 2025-жылдын 10 айында аялдар жана балдардын укуктарын бузуу боюнча 129 арыз келип түшкөн, алардын 24ү үй-бүлөлүк зомбулук маселелерине тиешелүү.
