Кыргыз Республикасынын Саламаттык сактоо министрлиги 2026-жылы Меккеге Хаджга барууну пландаштырган жарандар үчүн вакцинацияны уюштурууну баштады. Бул чаралар санитардык-эпидемиологиялык коопсуздукту камсыз кылуу жана инфекциялык оорулардын жайылышын азайтуу максатында кабыл алынууда.
Министрликтин буйругуна ылайык, зыяратчылар менингококк инфекциясына жана сезондук гриппке каршы вакцинациядан өтүшү керек. Бул кадамдар медицина жана санитария боюнча эл аралык талаптарга жооп берет жана Хаджга баруу үчүн зарыл шарт болуп саналат.
Вакцинация процесси 2025-жылдын 23-30-декабрында өлкө боюнча медициналык мекемелерде жүргүзүлөт, мында ар бир зыяратчы алдын ала медициналык текшерүүдөн өтүшү керек. Иммунизация бардык коопсуздук стандарттарына, анын ичинде "суук чынжыр" жана инфекцияны контролдоо эрежелерине ылайык жүргүзүлөт.
