«Гренландия маселесинде бизди колдобогон өлкөлөргө тарифтерди колдонушум мүмкүн, анткени бул арал бизге чындап эле керек», — деди Трамп, Ак үйдө сүйлөп жатып. Ал ошондой эле башка өлкөлөрдү Америкадагы дары-дармектердин баасын төмөндөтүү боюнча кызматташууга мажбурлоо үчүн бажы салыктарын кантип колдонгонун айтып берди.
Бул сөздөр НАТОго мүчө бир нече өлкө Гренландияга аскер күчтөрүн жибергенден кийин айтылды.
Эскерте кетсек, Конгресске Гренландияны аннексиялоо жана ага штат статусун берүү боюнча мыйзам долбоору сунушталган. Документте президентке аралды сатып алуу үчүн «керектүү кадамдарды» жасоого укук берилери жазылган.
Мурда Трамп АКШ «кайсыл бир жол менен» Гренландияны көзөмөлгө алат деп билдирген. Ал президенттик мөөнөтүнүн биринчи жылында бул аралды сатып алууну сунуштаган жана 2025-жылдын мартында анын аннексияланышы мүмкүн экенине ишенимин дагы бир жолу билдирип, Копенгагенге соода бажы салыктарын киргизүү менен коркуткан.
Гренландия Даниянын автономдуу аймагы болуп саналат. 1951-жылы АКШ жана Дания аралды коргоо боюнча келишимге кол коюшкан, ал Америкага анын потенциалдуу коркунучтардан коргоосун камсыз кылууга милдеттендирет.
