Бишкектин Октябрь районунун Ички иштер башкармалыгынын кызматкерлери алдамчылыкка шектелген аялды кармашты. Бул тууралуу укук коргоо органдарынын басма сөз кызматы маалымдады.
Ведомствонун маалыматына ылайык, милицияга Т.О. аттуу тургун кайрылып, З.К. аттуу жаран спорттук товарларды Түркиядан жеткирүү деген шылтоо менен анын 1,2 миллион сом акчасын алдап алганын жана качып кеткенин билдирген.
Бул факт боюнча Кыргыз Республикасынын Кылмыш кодексинин 209-беренеси (алдамчылык) боюнча кылмыш иши козголду.
Оперативдүү-издөө иш-чараларынын натыйжасында 1993-жылы туулган З.К. аттуу шектүү кармалды. Ал убактылуу кармоо жайына жайгаштырылды.
Укук коргоо органдары бул аялдын аракетинен жабыркаган же кандайдыр бир маалыматка ээ болгон бардык жарандарды 0 (700) 21-00-24, 0 (551) 90-00-59 же 102 номерлери боюнча кайрылууга чакырат.
