Шейшемби күнү Мармара деңизинде Азербайжан жана Түркиянын каттоосундагы эки мунай танкеринин кагылышуусу болду. Бул тууралуу Түркиянын транспорт жана инфраструктура министрлиги билдирип, окуя болгон жерге куткаруу кызматтары жөнөтүлгөнүн маалымдады, РИА Новости билдирет.
Стамбулда ошол күнү шамалдын ылдамдыгы 75 километрге чейин жетип, бир нече паром каттамдары токтотулду.
Министрликтин маалыматы боюнча, Азербайжан желеги астында катталган 141 метр узундуктагы Kalbajar танкери 115 метр узундуктагы түрк танкери Alatepe менен кагышкан. Окуя Кючүкчекмедже аймагында болду.
Кемелерге жардам көрсөтүү үчүн буксир жана куткаруу командалары жөнөтүлгөн, министрлик кошумчалады.
