Кыргыз Республикасынын Саламаттык сактоо министри Дамир Осмонов 2026-жылдын 22-мартында Чүй облусунун Ысык-Ата районунда жайгашкан Жаңы Покровка айылына жумушчу сапар менен барды. Бул тууралуу министрликтин басма сөз кызматы маалымдады.
Сапар учурунда министр мурдагы оорукананын имаратынын капиталдык оңдоп-түзөө этаптары менен таанышып, иш аяктагандан кийин 100 орундуу жаңы облустук төрөт үйүн ачуу пландалып жатканын билдирди.
Чүй облусунун саламаттык сактоо координациячысы Алмаз Аскаровдун айтымында, капиталдык оңдоп-түзөөгө каражат стабилизациялык фонддон бөлүнгөн, бардык иштердин аякташы быйылкы жылдын ноябрь айына күтүлүүдө.
Учурда Чүй облустук төрөт үйү мурда балдар бакчасы катары колдонулган жайларда жайгашып, бул толук кандуу адистештирилген медициналык жардам көрсөтүүгө мүмкүнчүлүктөрдү кыйла чектейт.
Бул долбоорду ишке ашыруу заманбап шарттарды түзүп, кош бойлуу жана төрөгөн аялдарга медициналык жардам көрсөтүү талаптарына жооп берет, ошондой эле Чүй облусунда энелик жана балалыкты коргоо боюнча кызматтардын жеткиликтүүлүгүн жана сапатын жакшыртат.
Министр иштердин мөөнөтүндө аякташынын маанилүүлүгүнө көңүл бурду жана алардын сапатын көзөмөлдөөнү тапшырды.
