Жергиликтүү тургундар Чүй облусунун аймагында, «12 камин» эс алуу зонасына жакын жерде атайын техникаларды колдонуп жер казуу иштеринин жүргүзүлгөнүн белгилешти.
Аламедин райондук мамлекеттик администрациясынан окуя болгон жерге чыккан комиссия «Чайна Роуд» компаниясынын ишинин убактылуу токтогондугу тууралуу маалыматты тастыктады.
«2025-жылдын 3-январында социалдык тармактарда жарыяланган сүрөттөрдө техника ОсОО «Чайна Роуд» компаниясына таандык экени көрүнүп турат. Бул уюм жол куруу үчүн инерттик материалдарды даярдоо жана казып алуу менен алектенген. Жергиликтүү тургундардын экологиялык зыяндан улам нааразычылыгына байланыштуу, Аламедин райондук мамлекеттик администрациясы атайын комиссия түздү. Жаңы кырдаалды талдап чыккандан кийин, бул участокто иштерди токтотуу чечими кабыл алынды. Учурда эч кандай иштер жүргүзүлбөйт», - деп айтылат расмий билдирүүдө.
