Ал бул көйгөй айыл чарба продукциясын гана эмес, ошондой эле тигүү өнөр жайын жана экономикадагы башка секторлорду да камтый турганын айтты.
Масабиров Россияга жөнөтүлгөн айрым товарлардын кайра кайтарылып жатканын белгиледи. «Учурда тигүү тармагында мындай кырдаал байкалууда. Биздин өлкөдө логистикалык борбор жок экенине эмне себеп?» — деп депутат суроо узатты.
Экономика министри Бакыт Сыдыков 228 гектар аянтта Wildberries долбоорунун алкагында соода-логистикалык борбор (СЛБ) курула турганын билдирди. Ал долбоор болжол менен 6700 жумуш ордун түзүүнү жана склад жайларын курууну камтыйт деп кошумчалады. «Логистикалык борбордун курулушу 2028-жылга чейин пландалууда», — деди министр.
Масабиров талкуу учурунда тигүү тармагындагы ишканалар үчүн төмөн пайыздык кредиттерди берүү зарылдыгын белгилеп, жеңил өнөр жайы Кыргызстан экономикасынын негизги компоненттеринин бири экенин баса белгиледи.
