Мамлекеттеги 1 миллион автоунаанын ичинен 80% 15 жаштан улуу
Кыргызстан өкмөтүнүн өкүлдөрү катализаторлор менен жабдылбаган автоунааларды каттоого жана кайра каттоого тыюу салуу боюнча сунуш киргизишти. Бул тууралуу Табигый ресурстар, экология жана техникалык көзөмөл министрлигинин атмосфералык абаны коргоо бөлүмүнүн начальниги Нурсултан Ташыбек уулу жакында өткөн брифингде билдирди.
Анын айтымында, учурда өлкөдөгү абанын сапатын жакшыртуу менен алектенген ведомстволор аралык комиссия иштеп жатат жана 2025-жылы анын ыйгарым укуктары кеңейтилип, жаңы милдеттер жүктөлгөн.
Комиссиянын сунуштарынын бири республикадагы автоунаа паркын жөнгө салуу болду.
«Эски автоунаалар абаны булгануунун негизги себептеринин бири болуп саналат. Биздин өлкөдө 1 миллиондон ашык автоунаа катталган, алардын 80% 15 жаштан улуу. Бишкекте мындай автоунаалардын саны 400 миңден ашык. Убакыттын өтүшү менен автоунаалардын катализатору, же каталитикалык анализатору иштен чыгат, ал чыгарылган газдарды фильтрациялоого жооп берет. Биз катализаторлорду сатып алуучу пункттарды аныктоо боюнча рейддерди жүргүзүп жатабыз. Ар бир жаран бул түзүлүштүн болушу милдеттүү экенин түшүнүшү маанилүү», - деди Нурсултан Ташыбек уулу.
Катализатор автоунаанын дөңгөлөктөрү сыяктуу эле ажырагыс бөлүгү болушу керек.
«Бүгүнкү күндө милдеттүү техникалык көзөмөл жүк жана жүргүнчүлөрдү ташуучу транспорт каражаттарына гана жайылтылууда, ал эми башка автоунаалар үчүн мындай текшерүү жок. Эгерде техникалык көзөмөл бардык автоунаалар үчүн жүргүзүлсө, биз жыл сайын катализаторлордун болушун текшере алмакпыз. Ошондуктан биз альтернативдүү чечимдерди издеп жатабыз. Мисалы, автоунааларды каттоо жана кайра каттоо учурунда катализаторлордун болушун текшерүүнү пландап жатабыз. Эгер катализатор жок болсо, каттоо жүргүзүлбөйт. Азырынча бул сунуш гана, бирок биз аны келерки жылдын биринчи кварталында талкууга чыгарууну пландап жатабыз», - деп кошумчалады ал.
Сүрөт www
