Кыргызстанда ар бир медициналык кызматкерге өз коэффициенти берилет, ал эми негизги айлык 7040 сомду түзөт. Бул маалыматты Саламаттыкты сактоо министрлигинин бюджеттик саясат жана финансылык анализ башкармалыгынын жетекчиси Клара Осконбаева «Элден собол» программасында айтып берди.
Осконбаевадын айтымында, 7040 сом — бул бардык кызматкерлер үчүн стандарттык айлык, бирок коэффициенттер ар кандай. Саламаттыкты сактоо системасында дарыгерлер үй-бүлөлүк дарыгерлерге жана башка адистерге бөлүнөт.
«Жогорку окуу жайын аяктап, ординатурада бир жылдык практикадан өткөндөн кийин, үй-бүлөлүк медицина борборуна ишке орношкон жаш адистер негизги айлык катары 31 322 сом алат», - деди ал.
Учурда, 1-апрелге чейин, үй-бүлөлүк дарыгерлердин айлыгы 22 880 сомду түзөт. Ошондой эле, айылдык жана алыскы тоолуу аймактарда иштегендиги үчүн кошумча төлөмдөр каралган.
«Президент Элдик курултайда компенсациялык төлөмдөрдү киргизүүнү сунуштады. Дарыгерлер жана медайымдар айына 15 000 сом, ал эми жогорку медициналык персонал 5 000 сом алат», - деп кошумчалады Осконбаева.
