Трамп Дания, Норвегия, Швеция, Франция, Германия, Улуу Британия, Нидерланд жана Финляндиядан АКШга жеткирилген бардык товарларга 10% бажы салыгы алынарын билдирди, бул европалык лидерлердин катуу реакциясын жаратты.
ЕСтин лидерлери, анын ичинде Урсула фон дер Ляйен жана Антониу Кошта, бул коркутууларды айыптап, мындай аракеттер трансатлантикалык байланыштарды бузушу мүмкүн экенин белгилешти.
Франциянын президенти Эммануэль Макрон Трамптын билдирүүлөрүн «жарашпаган жана кабыл алынгыс» деп атап өттү. Швециянын премьер-министри Ульф Кристерссон да өз өлкөсү «шантажга жол бербестигин» белгиледи. Өз кезегинде, Улуу Британиянын премьер-министри Кир Стармер бажы салыктары боюнча АКШга кайрыларын айтып, Трамп «абдан жаңылыш» экенин билдирди.
Данияда жана Гренландияда америкалык президенттин аракеттерине каршы массалык нааразылык акциялары өттү. Мындан тышкары, сегиз европалык өлкө күч көрсөтүү максатында аралга аскерлерин жиберди.
Ошондой эле, Гренландияны «аннексиялоо жана ага штат статусун берүү» боюнча мыйзам долбоору АКШ Конгрессине сунушталды.
Трамп мурда Гренландияны «кайсы бир жол менен» өз контролуна алууну көздөп жатканын белгилеп өткөн. Ал биринчи президенттик мөөнөтүндө бул аралды сатып алууну сунуш кылган, ал эми 2025-жылдын мартында аны аннексиялоону сунуштап, Копенгагенге соода бажы салыктарын киргизүү менен коркуткан.
Гренландия Даниянын автономдуу бөлүгү болуп саналат. 1951-жылы Вашингтон менен Копенгаген арасында аралды коргоо боюнча келишимге кол коюлган, бул келишим АКШны Гренландияны мүмкүн болгон коркунучтардан коргоого милдеттендирет.
