Мындан тышкары, даттар жана гренландиялыктарды камтыган миңдеген адамдар Копенгаген жана Нуук көчөлөрүнө чыгып, Дональд Трамптын Гренландияны сатып алуу ниетине каршы нааразычылык билдиришти.
Нааразычылык билдиргендер «Гренландиядан колуңарды алгыла» деген жазуусу бар плакаттарды жана аралдын желектерин кармап турушту.
Ошондой эле, акцияга Гренландиянын премьер-министри Йенс-Фредерик Нильсен катышты.
«Бүгүн көп адамдар Гренландияны колдоо үчүн демонстрацияларга катышууну тандашты. Дат жана гренландия желектери бирге желбиреп жатканын көрүү абдан жакшы», — деп жазды Даниянын премьер-министри Метте Фредриксен Instagram'ында.
Эскерте кетсек, АКШ Конгрессинде «Гренландияны аннексиялоо жана ага штат статусун берүү» боюнча мыйзам долбоору каралууда.
Бул документтин түшүндүрмө жазуусунда, АКШ президенти Гренландияны өз аймагы катары сатып алуу үчүн «керектүү бардык чараларды» көрүүгө укуктуу экени көрсөтүлгөн.
Буга чейин Трамп Америка Кошмо Штаттары «кайсыл бир жол менен» аралды көзөмөлгө алат деп билдирген. Ал биринчи президенттик мөөнөтүндө Гренландияны сатып алууну сунуш кылган, ал эми 2025-жылдын мартында Копенгагенге соода бажы салыктарын киргизүү менен коркутуп, аны аннексиялоого болорун айткан.
Гренландия Даниянын курамындагы автономдуу аймак болуп саналат. 1951-жылы Вашингтон жана Копенгаген аралды коргоо боюнча келишимге кол коюшкан, бул НАТО алкагындагы союздаштык милдеттенмелерин толуктап турат. Бул келишимге ылайык, АКШ Гренландияны мүмкүн болгон агрессиядан коргоо милдетин алган.
