Маалыматка ылайык, 2025-жылдын 23-ноябрында Иссык-Куль районунун Ички иштер бөлүмүнө арыз түшкөн. Анда ошол эле күнү болжол менен 23:24 чамасында Бостери айылындагы көлдүн жээгинде жайгашкан эс алуу жайлардын биринде, азиялык көрүнүшкө ээ жаран мыйзамсыз түрдө наркотикалык заттарды сактап жана колдонуп жаткандыгы көрсөтүлгөн.
Арыз ЕРП Иссык-Куль райондук Ички иштер бөлүмүндө катталган, андан кийин тергөө иштери башталган.
Жүргүзүлгөн оперативдүү-издөө иш-чараларынын натыйжасында шектүү катары Иссык-Куль районунун тургуну К.К., 2000-жылы туулган, кармалган. Текшерүү учурунда анын колунда жапайы каннабистин мүнөздүү жыты бар зат табылып, ал алынган.
Табылган зат соттук-химиялык экспертизага жөнөтүлгөн. Экспертизанын жыйынтыгы боюнча, ал наркотикалык зат — каннабистин концентраты (марихуана) болуп эсептелет. Заттын таза салмагы 270 граммды түзгөн.
Бул факт боюнча Кыргыз Республикасынын Кылмыш кодексинин 283-беренесинин 1-бөлүмүндө каралган кылмыш белгилери аныкталган. Кылмыш иши козголгон.
«Тергөө иштеринин алкагында Иссык-Куль районунун Ички иштер бөлүмүнүн кылмышты издөөгө жооптуу кызматкерлери Бактуу-Долонотту, Корумду жана Бостери айылдарындагы бир нече жарандардын үйлөрүндө мыйзамдуу тинтүү жүргүзүштү.
Тинтүү учурунда 1978-жылы туулган жаран М.К.нын үйүндө жапайы каннабистин мүнөздүү жыты бар күрөң түстөгү зат табылган.
Ошондой эле 1959-жылы туулган жаран О.Б.нын үйүндө жана короосунда каннабистин мүнөздүү жыты бар жашыл зат, ошондой эле үч кызыл түстөгү патрон табылып, алар далилдер катары алынган.
Мындан тышкары, жаран О.Б. өз ыктыяры менен белгисиз маркадагы үч ок атуучу куралды, 29 гильзаны жана бир бөтөлкө ок менен тапшырган.
Жогорудагы фактылар боюнча 1978-жылы туулган жаран М.К. жана 1959-жылы туулган жаран О.Б. боюнча өзүнчө материалдар бөлүнүп, ЕРП Иссык-Куль районунун Ички иштер бөлүмүндө катталган. Алар боюнча тергөө иштери жүргүзүлүүдө. Алынган заттарга соттук-химиялык экспертиза дайындалган», - деп айтылат билдирүүдө.
