Бишкекте, Ленин районунун Ички иштер башкармалыгынын кызматкерлери бир нече уурулук кылууга шектелген адамды кармашты.
Маалыматка ылайык, 2025-жылдын 17-ноябрында, саат 14:40 чамасында, К.Б. аттуу жаран райондук башкармалыкка арыз менен кайрылган. Ал «Mercedes-Benz» маркасындагы суу ташуучу унаадан аккумулятор уурдалганын билдирген. Белгисиз адамдар аккумуляторду жашыруун уурдап, окуя болгон жерден качып кетишкен.
Бул иш боюнча тергөө жүргүзүлүп, Кыргыз Республикасынын Кылмыш кодексинин 205-беренеси (Уурулук) боюнча кылмыш иши козголгон.
Оперативдүү-издөө иш-чараларынын жүрүшүндө милиция шектүүнүн ким экенин аныктоого жетишти. Ал 1997-жылы төрөлгөн Ж.Э. болуп чыкты. Ага сыртка чыкпоо тууралуу тил кат чарасы колдонулган.
Учурда ал дагы төрт окшош кылмышка тиешеси бар экени аныкталды.
Эгер сиз бул жосунсуздун курмандыгы болсоңуз, анда 0559 102 102 же 102 номерлери боюнча билдирүү бериңиз.
Тергөө уланууда.
