Ош облусунда, Ноокат районунда, «Хизб ут-Тахрир аль-Ислами» диний-экстремисттик уюмунун 11 колдоочусунун иши токтотулду. Бул тууралуу Кыргызстандын Улуттук коопсуздук мамлекеттик комитети маалымдады.
Ведомствонун маалыматына ылайык, 10-февралда район аймагында аталган уюмдун активдүү мүчөлөрүнүн үйлөрүндө тинтүү жүргүзүлгөн.
Тинтүү натыйжасында 75 китеп, 14 мобилдик телефон, 18 блокнот, 86 DVD-диск, 4 планшет, 1 ноутбук, 2 SIM-карта, 14 Россия Федерациясынын паспорту, 1 мөөр, 1 видеокассета жана 1 «Бакай Банк» банктын картасы сыяктуу 217 предмет алынды.
Алынган материалдар соттук диний экспертизага жөнөтүлдү. Анын жыйынтыгы боюнча «Хизб ут-Тахрир аль-Ислами» уюмунун мүчөлөрүнө карата мыйзамга ылайык чаралар көрүлөт.
Оперативдик иш-чаралар уланууда. ```
