МЧСтин маалымат кызматынын билдирүүсүнө караганда, Чүй облусунун Жайыл районундагы Бороондуу жайытында издөө-куткаруу операциялары түн киргендиктен токтотулган.
Бүгүн издөө иштерине 55 адам катышты. Жумуштун натыйжасында 20 койдун сөөгү чыгарылды. Учурда жалпы 30 баш мал табылган.
Куткаруучулар лавина түшкөн жерден 5 километр алыстыкта жайгашкан чабандардын үйүндө түнөөгө чечим кабыл алышты. Издөө иштерине катышкан жергиликтүү тургундар үйлөрүнө кайтышты. Операция эртең, 15-февралда улантылат.
Turmush мурда билдиргендей, окуя 12-февралда болгон, 59 жаштагы эркек киши атта отуруп, 50 койду айдап бара жатып лавинага кабылган.
Издөө иштерине кырсык тууралуу сигнал алынгандан кийин дароо башталган жана алардын жүрүшү өзгөчө кырдаалдар министри генерал-лейтенант Бообек Ажикеева тарабынан көзөмөлдөнүп жатат.
