Укук коргоо органдарынын маалыматына ылайык, 2025-жылдын 26-декабрында Москва районунун ички иштер бөлүмүнө 1989-жылы туулган жаран жамааттык арыз менен кайрылган. Ал 1993-жылы туулган жаран 2024-жылдан бери Ак-Суу капчыгайында ГЭСтин курулушунда бетон иштерин аткаруу үчүн жумушчуларды тартканын билдирген. Айлык акысы 50–60 миң сомдун чегинде белгиленген, бирок 2025-жылдын декабрь айында төлөмдөр жүргүзүлгөн эмес.
Тергөө материалдарына ылайык, аталган мезгилде болжол менен 7 200 кубометр бетон иштери аткарылган. Заказчыдан алынган жалпы сумма 43,4 миллион сомдон ашып, анын ичинен 3,1 миллион сомдон ашыгы салык катары төлөнгөн.
Бул жагдайларга байланыштуу Кыргыз Республикасынын Кылмыш кодексинин 209-беренеси боюнча "Алдамчылык" кылмыш иши козголду. Шектүү кармалып, убактылуу кармоо жайына жайгаштырылды. Тергөө уланууда.
