Шаардык администрациянын маалыматына ылайык, бул долбоор негизги кирүү жолдорундагы тыгындарды жоюу жана автоунаа айдоочулары үчүн шарттарды жакшыртуу максатын көздөйт.
Курулуш иштерин «Кыргызавтожол-Юг» мамлекеттик ишканасы транспорт жана байланыш министрлиги менен кызматташып жүргүзүүдө.
Мамлекеттик ишкананын өкүлү Муса Бердигуловдун айтымында, курулуш аянтчасында көптөгөн техникалар колдонулууда. «Көк-Арт дарыясынын жээгинде жайгашкан жаңы жол Бишкек—Ош трассасын Манас—Благовещенка жолуна туташтырат. Жаңы маршруттун узундугу 9,2 километр, туурасы 8 метрди түзөт. Долбоордун каржылануы республикалык бюджеттин эсебинен жүргүзүлүүдө. Учурда даярдоо иштерин жүргүзүүдө, ошондой эле смета жана долбоордук документация иштелип чыгууда. Объектте 22 самосвал, 2 жүктөгүч, 2 экскаватор жана 1 грейдер иштеп жатат», — деп белгиледи Бердигулов.
Курулушту ушул жылдын аягына чейин аяктоо пландалууда. Келечекте жаңы жол Манаска кирүү үчүн альтернативдүү маршрут болуп калат.
