Президенттин өкүлчүлүгүнүн маалыматы боюнча, 17-февралда Ош облусунун 2025-жылдагы социалдык-экономикалык өнүгүүсүнүн жыйынтыктарын чыгаруу жана 2026-жылга приоритеттүү милдеттерди коюу боюнча коллегиалдык жыйын өттү. Жыйында Министрлер кабинетинин төрагасы Адылбек Касымалиев, Ош облусундагы президенттин ыйгарым укуктуу өкүлү Аманкан Кенжебаев, коллегиянын мүчөлөрү, өкүлдүн орун басарлары, райондордун акимдери, облустук мекемелердин жана ишканалардын жетекчилери, айыл өкмөттөрүнүн башчылары катышты.
Күн тартибиндеги маселелер боюнча Ош облусундагы президенттин ыйгарым укуктуу өкүлү Аманкан Кенжебаев доклад жасап, 2026-жылга коюлган милдеттер жана пландар тууралуу маалымат берди.
Облустун жетекчисинин айтымында, учурда жүргүзүлгөн иш-аракеттердин натыйжасында 2025-жылы облустун аймагында 120 жаңы ишкана ачылып, 1474 максаттуу жумуш оруну түзүлгөн. Жалпысынан бардык тармактарда 17 миң 453 жумуш оруну түзүлгөн. Алардын эсебинен өнөр жай секторунда 5 млрд 938,5 млн сом инвестиция тартылган. Өткөн жылдын ушул мезгили менен салыштырганда 3 млрд 392,9 млн сомго көп инвестиция тартылган. Облустагы дотациялар өткөн жылга салыштырмалуу 3,5% га кыскарган. 2025-жылы дотациядан 1 шаар жана 5 айыл өкмөтү чыкты:
- Гульча шаары (Алай району);
- Кок-Жар айыл өкмөтү (Ноокат району);
- Достук айыл өкмөтү (Араван району);
- Дөң-Булак айыл өкмөтү (Узген району);
- Кароол айыл өкмөтү;
- Салам-Алик айыл өкмөтү (Узген району).
2025-жылы жолдорду асфальттоо үчүн Стабилизациялык фонддон жана республикалык бюджеттен жалпы 8 млрд 233 млн сом бөлүнгөн, 415,9 км жол оңдолуп, асфальтталган. Бул өткөн жылга салыштырганда 188,4 км көп.
Курулуш тармагында 2025-жылы республикалык бюджеттен 2 млрд 455 млн сом бөлүнүп, 43 объект курулган, анын ичинде: 11 мектеп, 12 бала бакча, 6 спорт зал жана спорт аянтчасы, 1 ооруканасы, 11 капиталдык оңдоо объектиси жана 2 таза суу объектиси.
2025-жылы облусту өнүктүрүү фондуна 250 млн сом акча каражаты бөлүнгөн. Жыл ичинде фондго 102 долбоор келип түшүп, алардын ичинен 42 долбоор жактырылып, каржыланган.
Агроөнөр жай тармагында өткөн жылы Ош облусунда айыл чарба продукциясы 85 млрд 843,3 млн сомго өндүрүлгөн, физикалык көлөмдүн индекси 103,4% түзгөн. Бул Кыргызстан боюнча айыл чарба продукциясынын жалпы көлөмүнүн 18,7% ын түзөт.
Колдонулбай жаткан жерлерди пайдаланууда оң натыйжалар алынган: 810 гектардан аянт 154 гектарга кыскарган. Учурда колдонулбай жаткан жерлердин жалпы аянты 617 гектарды түзөт.
Жылдын негизги жыйынтыктары боюнча докладды аяктагандан кийин Аманкан Кенжебаев 2026-жылга милдеттер жана пландар тууралуу маалымат берип, райондордун акимдерине, облустук мекемелердин жана ишканалардын жетекчилерине, айыл өкмөттөрүнүн башчыларына бир катар тапшырмаларды берди.
