Иш-чарага шаар мэри Нуртилек Орозбаев, Кыргыз Республикасынын президентинин Жалал-Абад облусундагы ыйгарым укуктуу өкүлүнүн аппаратынын жетекчиси Адилет Акбаралиев, шаардык кенештин төрагасы Чынгыз Кимсанов, мекемелердин жана ишканалардын жетекчилери, ошондой эле жооптуу кызматкерлер катышты.
Коллегиянын күн тартибине 2025-жылга социалдык-экономикалык өнүгүү программасын аткаруу жана бекитилген иш-чаралар планы, ошондой эле 2026-жылга коюлган тапшырмалар киргизилди. Жыйында 2025-жылы социалдык, инфраструктуралык жана чарбалык багыттарда аткарылган иштер тууралуу кенен маалымат берилди.
Маалыматка ылайык, социалдык-экономикалык өнүгүүнү стимулдаштыруу үчүн бөлүнгөн гранттардын эсебинен 7 долбоор ишке ашырылды. Алардын арасында: №2 жана №3 жалпы практикалык дарыгерлер борборунун имараттарын оңдоо; социалдык объектилерге алып баруучу ички жолдорду асфальттоо; Сера көчөсүнөн борбордук базарга чейин тротуар куруу; «Кайыңды» эс алуу зонасынын административдик корпусун оңдоо; «Келечек» жана «Баластан» бала бакчаларынын жылуулук системасын жаңылоо, ошондой эле Кетмен-Тобо айылындагы коомдук профилактикалык борбордун имаратын оңдоо бар.
Мындан тышкары, Жалал-Абад облусунун өнүктүрүү фонду аркылуу кырдаалдык борборду түзүү, санариптик радиобайланыш менен камсыздоо, «Келечек» бала бакчасын техникалык жабдуулар жана мебель менен камсыздоо боюнча иштер аткарылды. Ошондой эле, муниципалдык менчикти башкаруу үчүн лизинг аркылуу атайын техника сатып алынганы белгиленди.
Социалдык коргоо жана эмгек тармагында өткөн жылга салыштырмалуу кедейчилик деңгээли 61 үй-бүлөгө азайгандыгы тууралуу маалымат берилди. «Социалдык контракт» программасынын алкагында 18 үй-бүлө 150 миң сом өлчөмүндө кайтарымсыз жардам алды жана мал чарбачылыгы, арачылык, такси жана жүк ташуу, соода, ошондой эле сулуулук салондорунун кызматтары менен алектенүүгө киришти. Жумушсуздардын саны 19 адамга кыскарып, 81% түздү. Туруктуу жумушка 147 жаран жумушка орношту, 30 адам тигүүчү жана ПК оператору кесиптери боюнча окуудан өттү. Ошондой эле 47 адам акы төлөнүүчү коомдук иштерге тартылды.
Билим берүү тармагында окуучулар химия, физика, англис жана орус тилдери боюнча облустук олимпиадаларда 1-орун жана 3-орундарды, ошондой эле «Жаш пифагорлор» республикалык олимпиадасында 2-орунду ээлешти. Мындан тышкары, алар «Жаш таланттар» республикалык конкурсуна жана XII республикалык ачык чемпионатка «Premium–2025» катышып, сыйлык орундарын камсыздашты.
Саламаттыкты сактоо тармагында жаш кадрларды колдоо максатында, шаар мэри Нуртилек Орозбаевдын демилгеси менен жергиликтүү бюджеттен каражат бөлүнүп, учурда 5 студент медициналык окуу жайларында билим алууда.
Ошондой эле, Кара-Куль шаары 31 шаар арасында «Балдар жана жаштарга достук шаар» республикалык конкурсуна 3-орунду ээлегендиги белгиленди.
Коллегиянын жыйынтыгы боюнча облустук өкүлдүн аппаратынын жетекчиси өспүрүмдөрдүн кылмыштуулугун алдын алуу жана билим берүү тармагында кадрлардын жетишсиздиги боюнча маселелерди көтөрдү. Бул маселелер боюнча ал шаар жетекчилигинен тиешелүү адистер тарабынан жүргүзүлүп жаткан иштер жана иш-чаралар планы тууралуу жооп алды.
Коллегияда каралган маселелер талкууланды, айрым кошумчалар киргизилди, ошондой эле тиешелүү мекемелердин жетекчилерине аткаруу үчүн конкреттүү тапшырмалар берилди.
