1991-жылы Ош шаарында 71 мамлекеттик бала бакча болгон. Бирок 2004-жылга чейин алардын 40ы ар кандай жолдор менен жеке колго берилген. «Көз карандысыздык алгандан кийин, 1991-жылы Ошто 71 бала бакча иштеп жаткан. 2004-жылга чейин алардын 40ы приватизацияланган. 2011-2012-жылдары гана аларды кайтаруу боюнча активдүү чаралар көрүлдү. Бул убакытта 9 бакча муниципалдык менчикке кайтарылды, алардын арасында Кокум-Бий көчөсүндө жайгашкан 280 орундуу бала бакча бар. Учурда 31 бала бакча дагы кайтарылган жок», — деди ал.
Берилген маалыматтарга ылайык, кайтарылбаган 16 бала бакча учурда ар кандай мамлекеттик мекемелер тарабынан башкарылууда. Алардын арасында СПИД борбору, онкологиялык ооруканасы жана бир нече жогорку окуу жайларынын факультеттери бар. Мындан тышкары, мурдагы бала бакчалардын 15ке жакын имараты өндүрүш жана башка муктаждыктар үчүн колдонулууда.
Тынчтыкбек Бекташтегин Ош шаардык мэриясы жана шаардык кеңеш бала бакчаларды соттук инстанциялар аркылуу кайтаруу боюнча аракеттерин улантып жатканын айтты. Алар кайтарылган соң имараттар капиталдык оңдоодон өтүп, андан кийин билим берүү башкармалыгына өткөрүлөт.
Ал ошондой эле 2009-жылдан баштап Ошто жаңы бала бакчалар ачыла баштаганын белгиледи. Натыйжада бүгүнкү күндө шаарда 70 мамлекеттик бала бакча жана 80ден ашык жеке бала бакча иштеп жатат.
