Бул долбоордун алкагында бир нече мыйзам актыларына, анын ичинде Жарандык жана Салык кодекстерине өзгөртүүлөрдү киргизүү сунушталууда. Мындан тышкары, учурдагы «Дыйкан (фермер) чарбасы жөнүндө» мыйзамды «Дыйкан жана үй-бүлөлүк фермердик чарба жөнүндө» деп өзгөртүү пландалууда.
Негизги жаңылыктардын бири — чарбалоонун эки формасын киргизүү:
- Дыйкан чарбасы — бул эки же андан көп үй-бүлөнүн биргелешип айыл чарба продукциясын өздөрүнүн менчигинде, пайдаланууда же ижарада турган жер жана мүлккө негизделген, юридикалык статусу бар өзүнчө субъект.
- Үй-бүлөлүк фермердик чарба — бул бир үй-бүлөнүн эмгегине негизделген, физикалык жак статусуна ээ субъект, ал жер үлүшүндө же ижарадагы участокто, ошондой эле үйдүн жанындагы жерге айыл чарба өндүрүшүн жүргүзөт.
Мындан тышкары долбоордо, айыл чарба өндүрүшү менен алектенген үй-бүлөлүк фермердик чарба физикалык жак катары катталууга тийиш экени көрсөтүлгөн. Мындай чарбанын ар бир мүчөсү жер үлүшүнөн чыгып, өзүнчө үй-бүлөлүк чарба түзүүгө же дыйкан чарбасына кошулууга укуктуу.
Эгер мыйзам кабыл алынса, ал расмий жарыяланган күндөн 10 күн өткөндөн кийин күчүнө кирет, ал эми Министрлер кабинетине өз чечимдерин жаңы мыйзамга ылайык келтирүү тапшырмасы берилет.
