Бишкекте Кыргыз Республикасынын Суу ресурстары, айыл чарба жана кайра иштетүү өнөр жайы министрлиги менен Кореянын айылдык коомдорду өнүктүрүү корпорациясы (KRC) ортосунда өз ара түшүнүшүү меморандумун түзүү аземи өттү.
Министрликтин маалыматы боюнча, бул келишим суу жана жер ресурстарын башкарууда заманбап корея технологияларын киргизүүгө, ирригация системаларын модернизациялоого, айыл инфраструктурасын өнүктүрүүгө жана "акылдуу айылдар" концепциясын ишке ашырууга багытталган.
Мындай кызматташтык Кыргыз Республикасынын 2026-жылга чейин өнүгүү улуттук программасына ылайык келет жана Корея Республикасынан инвестицияларды жана расмий жардамды (ODA) тартуу үчүн негиз түзөт.
