Жыйында өлкөнүн ар кайсы аймактарындагы жолдордун абалын жакшыртуу зарылдыгына басым жасалды. Айрыкча, Нарын—Баетов унаа жолунун курулушун аяктоо маселеси талкууланды.
Транспорт министринин орун басары жолдун жалпы узундугу 112 км экенин, анын ичинен 80 км курулушу калганын билдирди. Бул жылы асфальттын биринчи катмары төшөлөт, анын үчүн эки подряддык уюмдар менен келишимдер түзүлгөн.
Мындан тышкары, депутаттар Кызыл-Тууй айыл өкмөтүнүн Сузак районундагы Ачы, Шатрак, Соку-Таш, Ак-Терек жана Алчалуу айылдарын бириктирген жолдун оңдолушун кайрадан баштоо талабын билдиришти. Транспорт министрлигинин маалыматы боюнча, бул участоктогу иштерди аяктоо ушул жылга пландалган.
Ошондой эле, суу ресурстары, айыл чарба жана кайра иштетүү өнөр жайы министрлигинен ирригация системасын жакшыртуу, ичүүчү суу менен камсыздоо жана капиталдык курулушту көзөмөлдөө боюнча чаралар тууралуу маалымат угулду. Депутаттар ирригация объектилерин жазгы талаа иштерине даярдоонун маанилүүлүгүн белгилешти.
Депутаттар тобунун жетекчиси Нурбек Сыдыгалиев жол инфраструктурасын жана ирригация системаларын өнүктүрүү экономикалык өсүшкө жана аймактардын транспорттук жеткиликтүүлүгүнө түздөн-түз таасир этээрин белгиледи.
