«Адилет Кыргызстан» депутаттык тобунун жыйынында Транспорт жана байланыш министрлигинен негизги жолдорду куруу жана реконструкциялоо, ошондой эле өлкөнүн аймактарындагы ички трассаларды оңдоо боюнча иштин жүрүшү тууралуу маалымат сунушталды.
Транспорт жана байланыш министринин биринчи орун басары Бекназар Базаралиев пландалган иштердин аткарылышы тууралуу маалымдады. Ал 2025-жылдын башына чейин 1092 километр жолду асфальттоо пландалып жатканын белгиледи. Бирок 2023-жылдын акырында 1606 километр жолдун курулушу аяктаган, анын ичинен 1545 километр асфальтталган. Ошондой эле ал өлкө боюнча жол тармагында 13 ири инфраструктуралык долбоорду ишке ашырууну белгиледи.
Депутат Исманали Жороев талкуу учурунда жолдорду оңдоо финансылык жактан негизинен кредиттер аркылуу жүргүзүлүп жатканын айтып, курулуш объектилеринин сапатына көзөмөл жүргүзүүнүн маанилүүлүгүн баса белгиледи. Ал Лейлек районунда «China Road» компаниясы тарабынан курулуп жаткан жолдун тардыгы боюнча нааразычылыгын билдирди, айрым жерлерде жолдун туурасы эки метрге жетпейт. Депутат Суйунбек Омурзаков Мырзаке-Кара-Кулжа-Алайкуу жолун асфальттоо маселесин республика бюджетинин алкагында карап чыгууну сунуштады.
Депутат Жылдыз Таалайбек кызы аймактардагы ички жолдордун абалын жакшыртуунун зарылдыгына көңүл бурду жана Нарын-Баетов жолунун курулушунун аякташы боюнча суроо берди. Жооп катары орун басар министр бул жолдун жалпы узундугу 112 километр экенин, анын ичинен 80 километрди аяктоо керек экенин билдирди. «Азыр эки компания менен келишимдер түзүлгөн, жана быйыл биринчи катмарды төшөө аякталат», - деп кошумчалады ал.
Депутат Жылдыз Курманалиева Ачы, Шатрак, Соку-Таш, Ак-Терек жана Алчалуу айылдарын байланыштырган жолдун оңдоо иштери токтотулуп калганына көңүл бурду жана аларды кайра баштоону сунуштады. Докладчы айтымында, иштердин аякташы быйылкы жылга пландалган.
Депутат Рахат Жунушбаева Балыкчы менен Караколду байланыштырган түштүк жолунун курулушун туристтик сезон башталгандан мурда аяктоонун маанилүүлүгүн баса белгилеп, иштер беш жылдан бери улантылып жатканын айтты.
Нуржамал Торобекова Ош-Сары-Таш-Эркештам автожолундагы прогресс тууралуу кызыкты.
Бахридин Шабазов Бишкектин тегерегиндеги түндүк айланма жолунун жана Ысык-Ата районундагы бир нече жолдордун аякташы боюнча суроо көтөрдү. Депутат Гулшаркан Култаева жол долбоорлорун ишке ашырууда ишенимдүү ири компанияларды тандоонун маанилүүлүгүн кошумчалады, анткени кичи подрядчиктер иштердин мөөнөтүн узартат. Депутат Равшанбек Рысбаев Абшыр-Ата эс алуу зонасына жол куруу маселесин да көтөрдү.
Гулнара Акимбаева жолдордун абалы өлкөнүн экономикалык өнүгүүсүнө жана аймактардагы транспорттун жеткиликтүүлүгүнө түздөн-түз таасир этерин белгилеп, бул тармакка инвестиция тартуу жана курулуштун сапатын жогорулатуу боюнча суроолорду көтөрдү.
Кубанычбек Самаков жол курулушунун сапасы боюнча тынчсыздануусун билдирип, кемчиликтерди жоюуга эмес, алардын алдын алууга көңүл бурууну чакырды.
«Адилет Кыргызстан» депутаттык тобунун жетекчиси Нурбек Сыдыгалиев министрлик жол инфраструктурасын өнүктүрүү менен активдүү алектенип жатканын белгилеп, Нарын-Ак-Талаа жана Ысык-Көл облусундагы долбоорлорду убагында аяктоонун зарылдыгына көңүл бурду. Талкуунун жыйынтыгында Транспорт жана байланыш министрлигинен алынган маалымат эске алынды.
Мындан тышкары, жыйында Суу ресурстары, айыл чарба жана кайра иштетүү өнөр жайы министрлигинин ирригациялык системаны жакшыртуу, ичүүчү суу менен камсыздоо жана капиталдык курулушка көзөмөл жүргүзүү боюнча ишмердүүлүгү тууралуу маалымат угулду. Депутаттар ирригациялык системаларды жазгы талаа иштерине убагында даярдоонун маанилүүлүгүн белгилешти.
